26 Aug. 2023

Andreas Mogensen cu rocket in International Space Station (ISS) lei a zuang cuahmah  

Danmark nih an izohthla tukmi astronaut Andreas Mogensen cu ISS ah kum cheu chung riantuan dingin nihin sml. 9.30 ah USA ram in a riantuanti hawi pathum he an ithawh cang. ISS cu USA, Japan, Rasia le Europe ram cheukhat pawl ibawmh in thlahmi vawleipi heltu satellite nganpi asi. Andreas Mogensen cu Danmark nih an izohthla ngaimi astronaut pakhat asi. Anih hi 2015 ah ISS cu a phan bal cang i ni 9 a um hnu ah a rak tum than. Hitin rocket in minung thlah in van ah a um ciami sattelite chungah kuat tik ah a biapi ngaimi le thil har ngai asi mi cu vawlei thlah/kah caan le van i aa hel cuahmah mi sattelite dangah va tum khi asi. Cucaah vawlei in kahnak cu tlamtling tein an lim cang. Hi hnu sml. 29 hrawngah ISS sattelite cu a phan te lai. ISS ah va fuh le tum kha thil har ngaimi cu asi ve.  

Denmark cozah nih biaknak caah hmanmi cauk zapi tonnak ah mei khangh lo dingah nawl chuah a timh

Biaknak pakhat nih a zumhnak hrampi caah a hmanmi cauk, Bible, Koran le Torah tbk. hna cu nicang loin zapi tonnak hmun ah mei in khangh lo dingin phungthar (lov) ser a duh (lovforslag a tuah). Hi bantukin Koran zapi tonnak ah mizapi hmuh in mei in an khangh ruangah Islam pawl an lung a fak ngaingai caah Denmark cozah sinah hnahnawhnak phunphun an tuah tikah Danmark ram caah sungzatlaknak nganpi a chuak. Cucaah hi bantukin cauk cu mizapi tonnak hmunah mei khangh lo dingin phungthar ser a timh. Hi phungthar ser a tinhmi cu Folketinget ah mi tam deuh hnatlak asi cang. Hi phung fehter asi tikah hi phung a buar mi cu dantat asi lai i kum 2 chung thong thlak khawh asi lai.

Vawleicungah a ngan bikmi vanlawng ngeitu company nih Denmark le USA karlak vanlawng kalnak lam a ser ve cang lai

Hmaikum thal (sommer) in vawleicungah a ngan bikmi vanlawng ngeitu company American Airlines nih København le Philadelphia (USA) karlak cu direct in vanlawng zuang khawh dingin vanlawng lamthar an ong ve cang lai. Hi nih US minung (American) pawl tam deuh Danmark ram a phan ter hna lai i Danmark caah thathnemhnak tampi a um lai ti kha zumh le iruahchanhmi cu asi. 

Denmark nih raltuknak vanlawng 19 Ukraine a bawmh

Denmark nih Ukraine cu raltuknak vanlawng F-16 timi 19 bomh a duh caah Ukraine president Volodymyr Zelenskyj cu amah pumpak in Denmark ramah August 20 ah a rak phan. Kan siangpahrang nu he zong an itong, cun Folketinget lei zong a kal i Folketinget hmai intual (Rigsdagsgården) ah Denmark mipi sinah biachimnak a ngei. Denmark le mipi cungah lunglawmhnak bia a chim. Denmark statsminister, Mette Frederiksen zong nih biachimnak a ngei ve. Ukraine nan ral cu kan ral asi ve i Ukraine nih ral nan tukmi cu Denmark ca zongah asi ve tiah a chim.

Kum 90 a tling cangmi tarmi cu kommune ah rian a tuan peng rih

Odense Kommune ah tarnu, Christel Christensen, kum 90 a tling cangmi cu thianhhlim  (rengøringsassistent) rian a tuan rih ko. Anih cu kommune riantuantu vialte lakah kum upa bik asi nain a rian ngol/thlah cang dingah tinhlamhnak zeihmanh a ngei rih lo, tuan peng a duh rih. Pension kum a lonh tuk cang nain ka tuah khawhmi a um rih ko a ti i zarhkhat ah sml. 6 lengmang in a rian cu a tuan peng rih. 

Naser Khader cu Khrihfa ah a lut i pastor tuan dingin timhtuahnak a ngei cuahmah

Syria ram in Danmark a rak ipemmi Naser Khader cu a nu Syria mi asi i a pa cu Palestine mi asi. Anih cu Danmark ah ramkhel rian a rak tuan tawnmi asi i Folketinget ah kum tampi MP dirhmun in rian a tuan vemi asi. Atu cu Khrihfami pastor (præst) si a duh ve caah København Universitet ah pastor sianginn (præstuddannelse) a thawk cuahmah. Anih hi tuan deuh ah parti dangdang ah a rak um nain a donghnak parti a umnak cu Det Konservative Folkeparti asi. 2021 ah parti chungin chuah a rak si i cu hnu cun Khrihfa ah a lut mi asi.